اسمي سمية , كنت صبية صغيرة , عمري أقل من سبعة عشر سنة. ما كنت عم اتفاهم مع أهلي , مشاكل , عطول خناق ,  مع انو هنن طيبين , بس ما كانوا عم يفهموني .لقيت الحل انو اهرب من البيت . وهيك صرت اهرب من البيت كم يوم وارجع , واهرب عن جديد اكتر من مرة . وزادت مشاكلي مع اهلي . ويوم من الايام تعرفت على مجموعة فكرتن رح يساعدوني , بس بالعكس ضحكوا عليي واستغلوني , وجروني للطريق الغلط , ومن شغلة لشغلة وصلت فجأة ع سجن طرابلس . خفت كتير , وانهارت أعصابي , وضعت ......ولحسن حظي , تعرفت بالسجن على منى الاخصائية اجتماعية من جمعية دار الامل , هيي يللي ساعدتني وسمعت مشكلتي وهمومي , وزارت اكتر من مرة اهلي وعملت كل الطرق لتحسن علاقتي معن . وكمان ايمان الاخصائية النفسية من دار الامل كتير ساعدتني ت اتحمل الوضع بالسجن وقوي حالي وفكر كيف لازم ارجع اتصرف بس اضهر من السجن .وهيك بمساعدتن ضهرت بعد اربع شهور من السجن ورجعت لاهلي بفضلن , وعلاقتي كتير صارت منيحة معن .              صار عمري 20 سنة , وبعد كل اللي مرق ع راسي, أخدت قرار انو رح غير طريقة حياتي, وبدعم ع طول من دار الامل , صار عندي أمل أكتر بالمستقبل, ورح ادرس واعتمد ع حالي, واتعلم مهنة واشتغل, وساعد نشا الله حالي وساعد كمان عيلتي .......شكرا دار الامل